نیویارک اردو نے امریکہ میں ہونے والے وسط مدتی انتخابات میں ریاست مشی گان سے سینیٹ کے انتخابات میں ریپبلکن امیدوار مائیکل جوزف راجرز (Michael Joseph Rogers) کی حمایت کا اعلان کیا ہے۔ یہ اعلان نیویارک اردو کے مدیرِ اعلیٰ حسن مجتبیٰ نے ادارے کی طرف سے کیا ہے۔

حمایت کے اسباب اور مشترکہ آدرش

انہوں نے کہا ہے کہ ان سمیت نیویارک اردو کی ادارتی ٹیم کو ریپبلکن پارٹی کے مائیکل جوزف راجرز کی حمایت یا اینڈورسمنٹ کرنے کے کئی اسباب ہیں۔ ایک تو وہ ایک کہنہ مشق، امریکی عوام کے سچے، مخلص اور محب وطن سیاست دان و مدبر رہنما ہیں، جن کی آٹھویں کانگریشنل ڈسٹرکٹ سے عوامی خدمات ایک دہائی تک محیط ہیں۔

دوسرے، سب سے بڑی بات یہ ہے کہ ان کی تمام سیاست اور جدوجہد ان آدرشوں کی آئینہ دار ہے جن کے لیے نیویارک اردو کوشاں ہے۔ یعنی مختلف کمیونٹیز کے درمیان ہم آہنگی، بشمول اقوامِ ابراہیمی کے درمیان دوستی اور اینٹی سیمیٹزم⁦(⁩یہود دشمنی⁦)⁩کی بیخ کنی کی جدوجہد۔

مشی گان⁦:⁩بین العقائد ہم آہنگی کی ایک مثال

آج ان اصولوں اور اقدار کی جتنی مشی گان جیسی اہم اور گونا گوں ریاست کو ضرورت ہے، اس سے پہلے کبھی نہیں تھی۔ یعنی مشی گان ریاست کو ایک نقشۂ راہ اور مثال بنا کر باقی تمام امریکہ میں مختلف عقائد، رنگ و نسل کی کمیونٹیز کے درمیان ایک دوسرے کو سمجھنے، مکالمے اور مفاہمت کو فروغ دیا جائے۔

نیویارک اردو کا یقین ہے کہ امریکہ جیسے کثیرالثقافتی اور کثیرالمذہبی معاشرے میں مختلف کمیونٹیز کے درمیان اعتماد اور باہمی احترام کو مضبوط بنانا وقت کی اہم ضرورت ہے۔ اقوامِ ابراہیمی، یعنی مسلمانوں، یہودیوں اور عیسائیوں سمیت دیگر مذہبی و ثقافتی برادریوں کے درمیان دوستی اور تعاون کا فروغ ایک ایسے معاشرے کی تشکیل میں مدد دے سکتا ہے جہاں اختلاف کو دشمنی کے بجائے مکالمے اور افہام و تفہیم کا ذریعہ بنایا جائے۔

قیادت، تدبر اور عوامی خدمات کا ریکارڈ

مائیکل جوزف راجرز کا تدبر اور عوامی خدمات کا شاندار ریکارڈ انہیں اپنے مخالف امیدواروں پر سبقت دلاتا ہے اور ممتاز رکھتا ہے۔ نیویارک اردو کے نزدیک ایک ایسے وقت میں جب امریکی معاشرے کو تقسیم، مذہبی تعصب اور نسلی و ثقافتی کشیدگی جیسے چیلنجز کا سامنا ہے، ایسی قیادت کی اہمیت بڑھ جاتی ہے جو مختلف کمیونٹیز کے درمیان پل تعمیر کرنے اور مشترکہ اقدار کو آگے بڑھانے کی صلاحیت رکھتی ہو۔

نیویارک اردو سمجھتا ہے کہ مشی گان میں بین العقائد ہم آہنگی، اقوامِ ابراہیمی کی دوستی اور مذہبی و نسلی تعصبات کے خلاف جدوجہد کو فروغ دینے والے سیاسی اور سماجی رویے پورے امریکہ کے لیے ایک مثبت مثال بن سکتے ہیں۔ اس مقصد کے لیے مکالمہ، مفاہمت، باہمی احترام اور مشترکہ انسانی اقدار کو سیاسی اختلافات سے بالاتر ہو کر اہمیت دینا ضروری ہے۔